Na sede desta asociación de apoio ao inmigrante, situada nun belo edificio pombalino da Baixa Lisboeta, celebrouse o sábado 5 de decembro unha cea da Galiza, dentro da súa programación de encontros interculturais.

Ademais do apoio de Solidariedade Imigrante, e a colaboración de voluntarias da asociación como Clarance e Ana, o evento contou coa presenza de expertos cociñeiros galegos, nomeadamente, Luzia, Alba, Mariola e Miguel. Os cales se esforzaron para que a cea fose todo un éxito, e o menú deixase satisfeito a todos os presentes.

Despois de dar conta das empanadas, pementos, polbo e filloas, a sobremesa continuou coa elaboración dunha queimada e a degustación do noso licor nacional: o licor café.

Logo a seguir, a actuación de Sara Vidal e as súas alumnas de pandeireta deixaron marabillados aos asistentes, ademais de animar a sala, onde xa foran escoitados noutras noites pandeiros do Brasil ou de Cazaquistán.

O intercambio cultural non rematou aquí, pois a continuación Luzia Teixeiro e David Mesa encargáronse de falar sobre a forte emigración galega que recibiu Lisboa ao longo da historia da cidade, abrindo un debate na sobremesa que incidiu sobre a idea de que se ben a Europa está recibindo na actualidade os maiores fluxos migratorios de poboación, no pasado foi o continente que máis emigrantes enviou a África e América.

Tamén se apuntou que este feito non é valorado á hora de afrontar a chegada de cidadáns doutros países a cidades cunha marcada condición

intercultural, como é o caso de Lisboa.

Este interesante intercambio de ideas, onde se falou do fácil que é esquecer, deu por finalizada máis unha cea do grupo de Interculturalidade e Cidadanía da Solidariedade Imigrante.