A semana pasada celebrouse o congreso anual da AHGBI (Asociación de Hispanistas de Gran Bretaña e Irlanda) na Queen’s University of  Belfast.

Isto non tería particular interese para os lectorados de galego se non fose pola cada vez máis notoria presenza dos galeguistas nesta xuntanza anual. Na cita deste ano, o panel galego contou cun total de nove ponencias sobre diversos temas: cine, lingua, literatura… A particular contribución do CEG de Cork foi a presenza do seu director, David Mackenzie, como moderador de todas as sesións e a presentación dunha comunicación da lectora, Mónica Ares, sobre os latinismos nos Miragres de Santiago.

Foi unha ocasión interesante porque o galego vaise facendo cada vez máis visible no contexto do hispanismo das Illas Británicas e porque permite reunir especialistas procedentes de Galicia con outros que, asentados nas Illas, son habituais deste tipo de eventos. Entre os locais estaban Craig Patterson, Martín Veiga e Ryan Prout. Chegados de Galicia contamos coa presenza de Joaquim Ventura, David Rodríguez Lorenzo, Elisa Fernández Rei, Gabriel Pérez Durán, Paulo Martínez Lema, Rocío Dourado, Ricardo Pichel e Teresa Bermúdez.